Bíblia online

Liber Psalmorum, 95

¹ Canticum ipsi David, quando domus ædificabatur post captivitatem. Cantate Domino canticum novum ; cantate Domino omnis terra.

² Cantate Domino, et benedicite nomini ejus ; annuntiate de die in diem salutare ejus.

³ Annuntiate inter gentes gloriam ejus ; in omnibus populis mirabilia ejus.

⁴ Quoniam magnus Dominus, et laudabilis nimis: terribilis est super omnes deos.

⁵ Quoniam omnes dii gentium dæmonia ; Dominus autem cælos fecit.

⁶ Confessio et pulchritudo in conspectu ejus ; sanctimonia et magnificentia in sanctificatione ejus.

⁷ Afferte Domino, patriæ gentium, afferte Domino gloriam et honorem ;

⁸ afferte Domino gloriam nomini ejus. Tollite hostias, et introite in atria ejus ;

⁹ adorate Dominum in atrio sancto ejus. Commoveatur a facie ejus universa terra ;

¹⁰ dicite in gentibus, quia Dominus regnavit. Etenim correxit orbem terræ, qui non commovebitur ; judicabit populos in æquitate.

¹¹ Lætentur cæli, et exsultet terra ; commoveatur mare et plenitudo ejus ;

¹² gaudebunt campi, et omnia quæ in eis sunt. Tunc exsultabunt omnia ligna silvarum

¹³ a facie Domini, quia venit, quoniam venit judicare terram. Judicabit orbem terræ in æquitate, et populos in veritate sua.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: