Bíblia online

Liber Psalmorum, 141

¹ Intellectus David, cum esset in spelunca, oratio.

² Voce mea ad Dominum clamavi, voce mea ad Dominum deprecatus sum.

³ Effundo in conspectu ejus orationem meam, et tribulationem meam ante ipsum pronuntio:

⁴ in deficiendo ex me spiritum meum, et tu cognovisti semitas meas. In via hac qua ambulabam absconderunt laqueum mihi.

⁵ Considerabam ad dexteram, et videbam, et non erat qui cognosceret me: periit fuga a me, et non est qui requirat animam meam.

⁶ Clamavi ad te, Domine ; dixi: Tu es spes mea, portio mea in terra viventium.

⁷ Intende ad deprecationem meam, quia humiliatus sum nimis. Libera me a persequentibus me, quia confortati sunt super me.

⁸ Educ de custodia animam meam ad confitendum nomini tuo ; me exspectant justi donec retribuas mihi.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: