Biblia católica - Liber Sapientiae 1

Liber Sapientiae, 1

¹ Diligite justitiam, qui judicatis terram. Sentite de Domino in bonitate, et in simplicitate cordis quærite illum:

² quoniam invenitur ab his qui non tentant illum, apparet autem eis qui fidem habent in illum.

³ Perversæ enim cogitationes separant a Deo ; probata autem virtus corripit insipientes.

⁴ Quoniam in malevolam animam non introibit sapientia, nec habitabit in corpore subdito peccatis.

⁵ Spiritus enim sanctus disciplinæ effugiet fictum, et auferet se a cogitationibus quæ sunt sine intellectu, et corripietur a superveniente iniquitate.

⁶ Benignus est enim spiritus sapientiæ, et non liberabit maledicum a labiis suis: quoniam renum illius testis est Deus, et cordis illius scrutator est verus, et linguæ ejus auditor.

⁷ Quoniam spiritus Domini replevit orbem terrarum, et hoc quod continet omnia, scientiam habet vocis.

⁸ Propter hoc qui loquitur iniqua non potest latere, nec præteriet illum corripiens judicium.

⁹ In cogitationibus enim impii interrogatio erit ; sermonum autem illius auditio ad Deum veniet, ad correptionem iniquitatum illius.

¹⁰ Quoniam auris zeli audit omnia, et tumultus murmurationum non abscondetur.

¹¹ Custodite ergo vos a murmuratione quæ nihil prodest, et a detractione parcite linguæ: quoniam sermo obscurus in vacuum non ibit, os autem quod mentitur occidit animam.

¹² Nolite zelare mortem in errore vitæ vestræ, neque acquiratis perditionem in operibus manuum vestrarum.

¹³ Quoniam Deus mortem non fecit, nec lætatur in perditione vivorum.

¹⁴ Creavit enim ut essent omnia, et sanabiles fecit nationes orbis terrarum: et non est in illis medicamentum exterminii, nec inferorum regnum in terra.

¹⁵ Justitia enim perpetua est, et immortalis.

¹⁶ Impii autem manibus et verbis accersierunt illam, et æstimantes illam amicam, defluxerunt ; et sponsiones posuerunt ad illam, quoniam digni sunt qui sint ex parte illius.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados: