Biblia católica - Liber Sapientiae 10

Liber Sapientiae, 10

¹ Hæc illum qui primus formatus est a Deo patre orbis terrarum, cum solus esset creatus, custodivit,

² et eduxit illum a delicto suo, et dedit illi virtutem continendi omnia.

³ Ab hac ut recessit injustus in ira sua, per iram homicidii fraterni deperiit.

⁴ Propter quem cum aqua deleret terram, sanavit iterum sapientia, per contemptibile lignum justum gubernans.

⁵ Hæc et in consensu nequitiæ, cum se nationes contulissent, scivit justum, et conservavit sine querela Deo, et in filii misericordia fortem custodivit.

⁶ Hæc justum a pereuntibus impiis liberavit fugientem, descendente igne in Pentapolim:

⁷ quibus in testimonium nequitiæ fumigabunda constat deserta terra, et incerto tempore fructus habentes arbores: et incredibilis animæ memoria stans figmentum salis.

⁸ Sapientiam enim prætereuntes, non tantum in hoc lapsi sunt ut ignorarent bona, sed et insipientiæ suæ reliquerunt hominibus memoriam, ut in his quæ peccaverunt nec latere potuissent.

⁹ Sapientia autem hos qui se observant a doloribus liberavit.

¹⁰ Hæc profugum iræ fratris justum deduxit per vias rectas, et ostendit illi regnum Dei, et dedit illi scientiam sanctorum ; honestavit illum in laboribus, et complevit labores illius.

¹¹ In fraude circumvenientium illum affuit illi, et honestum fecit illum.

¹² Custodivit illum ab inimicis, et a seductoribus tutavit illum: et certamen forte dedit illi ut vinceret, et sciret quoniam omnium potentior est sapientia.

¹³ Hæc venditum justum non dereliquit, sed a peccatoribus liberavit eum ; descenditque cum illo in foveam,

¹⁴ et in vinculis non dereliquit illum, donec afferret illi sceptrum regni, et potentiam adversus eos qui eum deprimebant: et mendaces ostendit qui maculaverunt illum, et dedit illi claritatem æternam.

¹⁵ Hæc populum justum et semen sine querela liberavit a nationibus quæ illum deprimebant.

¹⁶ Intravit in animam servi Dei, et stetit contra reges horrendos in portentis et signis.

¹⁷ Et reddidit justis mercedem laborum suorum, et deduxit illos in via mirabili: et fuit illis in velamento diei, et in luce stellarum per noctem ;

¹⁸ transtulit illos per mare Rubrum, et transvexit illos per aquam nimiam.

¹⁹ Inimicos autem illorum demersit in mare, et ab altitudine inferorum eduxit illos. Ideo justi tulerunt spolia impiorum,

²⁰ et decantaverunt, Domine, nomen sanctum tuum, et victricem manum tuam laudaverunt pariter:

²¹ quoniam sapientia aperuit os mutorum, et linguas infantium fecit disertas.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados: