Biblia católica - Liber Ecclesiasticus 28

Liber Ecclesiasticus, 28

¹ Qui vindicari vult, a Domino inveniet vindictam, et peccata illius servans servabit.

² Relinque proximo tuo nocenti te, et tunc deprecanti tibi peccata solventur.

³ Homo homini reservat iram, et a Deo quærit medelam:

⁴ in hominem similem sibi non habet misericordiam, et de peccatis suis deprecatur.

⁵ Ipse cum caro sit reservat iram, et propitiationem petit a Deo: quis exorabit pro delictis illius?

⁶ Memento novissimorum, et desine inimicari:

⁷ tabitudo enim et mors imminent in mandatis ejus.

⁸ Memorare timorem Dei, et non irascaris proximo.

⁹ Memorare testamentum Altissimi, et despice ignorantiam proximi.

¹⁰ Abstine te a lite, et minues peccata.

¹¹ Homo enim iracundus incendit litem, et vir peccator turbabit amicos, et in medio pacem habentium immittet inimicitiam.

¹² Secundum enim ligna silvæ sic ignis exardescit: et secundum virtutem hominis sic iracundia illius erit, et secundum substantiam suam exaltabit iram suam.

¹³ Certamen festinatum incendit ignem, et lis festinans effundit sanguinem: et lingua testificans adducit mortem.

¹⁴ Si sufflaveris in scintillam, quasi ignis exardebit: et si exspueris super illam, extinguetur: utraque ex ore proficiscuntur.

¹⁵ Susurro et bilinguis maledictus, multos enim turbabit pacem habentes.

¹⁶ Lingua tertia multos commovit, et dispersit illos de gente in gentem.

¹⁷ Civitates muratas divitum destruxit, et domus magnatorum effodit.

¹⁸ Virtutes populorum concidit, et gentes fortes dissolvit.

¹⁹ Lingua tertia mulieres viratas ejecit, et privavit illas laboribus suis.

²⁰ Qui respicit illam non habebit requiem, nec habebit amicum in quo requiescat.

²¹ Flagelli plaga livorem facit: plaga autem linguæ comminuet ossa.

²² Multi ceciderunt in ore gladii: sed non sic quasi qui interierunt per linguam suam.

²³ Beatus qui tectus est a lingua nequam, qui in iracundiam illius non transivit, et qui non attraxit jugum illius, et in vinculis ejus non est ligatus:

²⁴ jugum enim illius jugum ferreum est, et vinculum illius vinculum æreum est ;

²⁵ mors illius mors nequissima: et utilis potius infernus quam illa.

²⁶ Perseverantia illius non permanebit, sed obtinebit vias injustorum, et in flamma sua non comburet justos.

²⁷ Qui relinquunt Deum incident in illam, et exardebit in illis, et non extinguetur, et immittetur in illos quasi leo, et quasi pardus lædet illos.

²⁸ Sepi aures tuas spinis: linguam nequam noli audire: et ori tuo facito ostia et seras.

²⁹ Aurum tuum et argentum tuum confla, et verbis tuis facito stateram, et frenos ori tuo rectos:

³⁰ et attende ne forte labaris in lingua, et cadas in conspectu inimicorum insidiantium tibi, et sit casus tuus insanabilis in mortem.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados: