Bíblia online

Liber Ecclesiasticus, 35

¹ Qui conservat legem multiplicat oblationem.

² Sacrificium salutare est attendere mandatis, et discedere ab omni iniquitate.

³ Et propitiationem litare sacrificii super injustitias: et deprecatio pro peccatis, recedere ab injustitia.

⁴ Retribuet gratiam qui offert similaginem: et qui facit misericordiam offert sacrificium.

⁵ Beneplacitum est Domino recedere ab iniquitate: et deprecatio pro peccatis recedere ab injustitia.

⁶ Non apparebis ante conspectum Domini vacuus:

⁷ hæc enim omnia propter mandatum Dei fiunt.

⁸ Oblatio justi impinguat altare, et odor suavitatis est in conspectu Altissimi.

⁹ Sacrificium justi acceptum est, et memoriam ejus non obliviscetur Dominus.

¹⁰ Bono animo gloriam redde Deo, et non minuas primitias manuum tuarum.

¹¹ In omni dato hilarem fac vultum tuum, et in exsultatione sanctifica decimas tuas.

¹² Da Altissimo secundum datum ejus, et in bono oculo adinventionem facito manuum tuarum,

¹³ quoniam Dominus retribuens est, et septies tantum reddet tibi.

¹⁴ Noli offerre munera prava, non enim suscipiet illa.

¹⁵ Et noli inspicere sacrificium injustum, quoniam Dominus judex est, et non est apud illum gloria personæ.

¹⁶ Non accipiet Dominus personam in pauperem, et deprecationem læsi exaudiet.

¹⁷ Non despiciet preces pupilli, nec viduam, si effundat loquelam gemitus.

¹⁸ Nonne lacrimæ viduæ ad maxillam descendunt, et exclamatio ejus super deducentem eas?

¹⁹ A maxilla enim ascendunt usque ad cælum, et Dominus exauditor non delectabitur in illis.

²⁰ Qui adorat Deum in oblectatione suscipietur, et deprecatio illius usque ad nubes propinquabit.

²¹ Oratio humiliantis se nubes penetrabit, et donec propinquet non consolabitur, et non discedet donec Altissimus aspiciat.

²² Et Dominus non elongabit: et judicabit justos, et faciet judicium: et Fortissimus non habebit in illis patientiam, ut contribulet dorsum ipsorum:

²³ et gentibus reddet vindictam, donec tollat plenitudinem superborum, et sceptra iniquorum contribulet:

²⁴ donec reddat hominibus secundum actus suos, et secundum opera Adæ, et secundum præsumptionem illius:

²⁵ donec judicet judicium plebis suæ, et oblectabit justos misericordia sua.

²⁶ Speciosa misericordia Dei in tempore tribulationis, quasi nubes pluviæ in tempore siccitatis.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: